主页 > 课堂技节 >勒索病毒全球性大爆发今次唔中下次都轮到你? >

勒索病毒全球性大爆发今次唔中下次都轮到你?

原创 课堂技节 作者: 时间:2020-06-19 13:40:58 678
勒索病毒全球性大爆发今次唔中下次都轮到你?

呢两日有只叫WannaCry勒索病毒全球性咁大爆发,唔少大机构甚至唔同国定嘅政府机构都出事,好多重要档案畀人锁晒勒索金钱。好多人觉得自己屋企部电脑净係用嚟上下网,冇乜重要嘢所以冇所谓,但有冇谂过今次可以锁你唔重要嘅档案,下次就可能係偷你重要嘅密码!

先防WannaCry

今次WannaCry搞到人心惶惶,如果你好彩未中但仲惊紧,可以试用下面几个方去令你安心返啲:

方法一
今次WannaCry主要係针对Windows嘅漏洞作出攻击,但其实Microsoft方面早已提供更新去填补。所以第一件事就係先进行Windows Update(不过你仲用紧Win XP就冇计喇),咁应该至少唔会再受WannaCry攻击,不过所谓道高一呎魔高一丈,咁都唔可以保证WannaCry会唔会有新版本或者有其他同类病毒透过Windows其他漏洞入侵。

勒索病毒全球性大爆发今次唔中下次都轮到你?

方法二
或者仲有唔少朋友用紧开心版Windows而唔敢进行Windows Update,咁你可以去揿入你Windows嘅「控制台>系统>远端设定(唔同版Windows路径会有别)」,然后取消「允许到这部电脑的远端协助连线」同选择「不允许远端连线到此电脑」,完全关闭被外部控制Windows嘅功能。

方法三
另外当然係安装返个网络保安软件,市面一啲保安软件係有针对呢类勒索病毒嘅特性,识得喺任何档案被强行加密前先行备份或者识得将个修改动作「虚拟执行」一次先。不过当然呢类软件可能会令你感到电脑速度有少少减慢,而且多数都係收费软件啦!至于装唔装同拣边只,就由你自行决定喇,费事你哋以为我卖广告啦。

方法四
如果你屋企有用Router,就可以利用Router内置嘅基本Firewall功能。只要你冇特别需要,其实可以长期关咗Router内置嘅DMZ功能,呢个功能本身就係令你部电脑变到好似直接连上互联网咁,方面一啲远端存取嘅功能。所以关咗佢,其实你部脑已经安全好多。另外Router亦内置一个叫UPnP嘅功能,呢个功能一样有机会令电脑处于直接暴露于Internet,所以冇乜要用,都可以长期关咗佢。

方法五
关闭SMB功能,呢个Windows内置功能主要係畀用家电脑间交换档案之用,关嘅程序比较複杂而且有机会影响到日常使用,笔者就觉得无谓咁做。

中咗有冇得救?

勒索病毒其实一直以嚟都存在,只不过今次所WannaCry直情识得透过Internet主动攻击Windows系统,所以就算你平时几小心同埋唔上可疑网站,都係有可能会出事。呢类病毒会将你电脑入面啲档案加密,然后勒索你畀钱先解得返。由于佢哋通常都希望你肯畀钱,所以一般勒索金额都唔会贵到你畀唔起。就以今次WannaCry勒索病毒为例,解锁金额为$300美金,呢个金额甚至比你坏Harddisk要救Data更平,好多人都费事烦直接畀钱解锁。但留意过往其实亦有唔少案例係你畀咗钱而最后都冇帮你解锁,就好似畀咗钱啲绑匪但最后都係被撕票一样。

咁如果真係畀唔起钱又或者唔想助长呢啲事,会唔会有其他方法解救到啲档案呢?答案係「睇你造化」。通常呢类病毒程式都係用一啲接近冇可能逆向还原嘅方法去将你档案加密,所以实际上你冇乜可能搵到解救方法。如果你咁啱中咗个万中无一有解救方法嘅勒索病毒,我会建议你顺手去买六合彩。

尽量避免高危动作

今次WannaCry係利用Windows嘅漏洞入侵,变相差不多可以话防不胜防,因为Windows系统仲有几多其他漏洞,係连Mircosoft都答你唔到。但唔通你话人总有一死,就可以随意去玩命咩?其实好多人用电脑嘅不良习惯,係会大大提升你中招嘅机会,咁有啲咩呢?


不良习惯一, 收到乜都直接开

人嘅本性就係冇事冇干嗰阵个个对周遭嘅介心都好低,任何电邮、IM等send过嚟嘅档案谂都唔谂就开咗。虽煞今次WannaCry唔係用呢种方式,但实际过去大部份勒索同木马程式都係透过呢种手法去入侵。


不良习惯二, 为方便置自己部电脑于危险地带

上面教大家防WannaCry嘅方法当中,其实有三项都係教大家点去令自己部电脑避开危险地带。例如觉得自己部脑冇重要嘢又唔想减慢速度而唔装保安软件,又例如为咗方便BT而开咗Router嘅DMZ功能等等。

不良习惯三, 胡乱安装免费软件同上危险网站

好多人只要听到朋友甚至网上唔誋识嘅人话某程式或者App好用就装就玩,其实有时你部机畀人Hack或者你个人资料漏咗出去,都可能係关呢啲不明来历程式嘅事。

有冇计安全啲但又玩得开心嘅方法?

照上面咁讲,唔通你叫人用电脑同上网乜都唔好做咩?咁同斩脚指避沙虫有咩分别?况且今次WannaCry係主动攻击,根本防不胜防。笔者当然唔係叫你哋乜都唔玩,但其实有几点建议係希望大家改变少少习惯,咁已经安全好多:

1, 重要档案常备份

呢样嘢真係老新常谈,就算你有备份重要档案,都有机会坏HD、坏DVD、唔见USB手指……其实依家好多云端服务例如Google Drive都係免费,真係好重要嘅档案例如好有纪念性嘅相、重要功课/文件等等,放上去,佢地个备份系统点都可靠过你自己屋企啰!不过我就唔建议你放啲唔见得人嘅相上去,毕竟曾经都发生过


2, 用正版Windows同保安软件

一砲过买断只大型开发咗几年嘅Game就嫌贵,垃圾手游就狂课金;几千蚊买张显示卡再加靓芒贵Mouse,Windows就用开心版。呢啲都係好多香港人习惯做嘅事。不过为安全起见,有啲钱真係唔应该悭。依家买只正版Windows都係千几蚊,连机更加只需几旧水。另外正版保安软件一般都係三几百连一年update,比起你唔觉意一中个勒索病毒平得多啦!

勒索病毒全球性大爆发今次唔中下次都轮到你?

3, 收咩都谂一谂起开

近年「顺丰」同「入境处」电话都街知巷闻,但都Keep住有人中招。其实网上啲诈骗档案一样好锺意扮晒其他正常程式,所以亦都会Keep住有人中招。如果你收到任何电邮或者甚他档案,最好都係先确定send畀你嘅人係咪真係你识嗰个,咁中招机会就大大降低。

防不胜防  有防好过唔防

其实只要做咗以上三样嘢,中招机会已经会好低。而就算中招,起码都唔会真係唔见晒对你嚟讲最重要嘅档案啦!

相关文章